Iwwert Shanghai an Neuseeland
"SHANGHAI" Déi Staat wollt ech scho ëmmer emol gesinn. Ass bestëmmt impressionnant mat hiren Héichhaiser an den asiatesche Flair. An esou ass et komm dass mir den 30ten Januar 2017 fir d'éischt op Shanghai fléien, do dräi Deeg bleiwen, an da weider an Neuseeland op Christchurch reesen. Do kréie mir eise Camper an zwar en Apollo Euro Star Deluxe.
Wéi ëmmer kënn dir eis iwwert de Link "Coucou" lenks schreiwen a mir wäerten eis freeën.
Wien gemengt huet, dass Shanghai wär wéi Hong Kong wou jiddereen englesch schwätzt deen hat sech geiirt. Genau wéi mir ! Déi wéinegst Leit schwätzen englesch. Praktesch an alle Geschäfter, Restauranten, Metro, Tempele gëtt nëmme chinesesch geschwat. Dobäi koum dass hei dat neit Joer gefeiert gëtt vum 28ten Januar un an enorm vill chinesesch Touristen an der Stat sinn. Dat ass esou well d’Leit hei während dem ganze Joer kee Congé hunn an da fir d’neit Joer 6-10 Deeg alles zou maachen a bei d’Famill ginn déi si net vill gesinn. Alles ronderëm Shanghai ass zou an d’Stat platzt aus alle Néit.
Vill Trafic um Huangpu River
Stroossemaart
Owes ass et dunn weider gang op Christchurch wou mir Samschdes ukomm sinn a Sonndes Moies eise Camper ofgeholl hunn.
En Apollo RV Star. De Rescht vum Dag ass ageraumt ginn a mir sinn op engem schéine Camping no beim Zentrum vu Christchurch.
Et war wonnerbar Wieder a mir sinn duerch de franséische Véierel getrëppelt. Vill Geschäfter waren zou duerch den Neijoerschdag. De leschten Dag hu mir nach eng flott Mall gemaach mat alle grousse Marken. Um leschte Stack konnt een all méiglech Workshoppe maachen. Wierklech flott.
Witzeg war dass Owes nom Iessen et un eiser Dier geklappt huet an ee sot « Mir hunn äre Fändel gesinn a wollte just Bonjour soen » Et muss e wëssen dass de Jang ëmmer direkt de lëtzebuergesche Fändel ophänkt a natierlech och dee vun dem Land wou mir da grad sinn.
Op jiddefalls war et flott e puer Wuert mat enger lëtzebuergescher Koppel ze schwätzen déi elo no 4 Wochen zréck op Auckland fiert a vun do nees Heem flitt.
Den éischten Dag si mir d’Stad Christchurch besiche gang. Déi ass nach ëmmer am Obbau nom Erdbierwen am Joer 2010/2011. Trotzdem hu mir do e flotten Dag verbruegt.
Mir sinn den Dag drop an de Norden gefuer vun der Südinsel. Eng Wäigéigend an dräi Päss déi mir gemaach hunn. Et war en laangen Tour well mir net méi dru geduecht hunn dass duerch d’Erdbiewen am Oktober ganz vill Stroossen an engem schlechten Zoustand waren. Maximal Vitesse war 30km op ville Platzen. Well mir awer zu Akaroa iwwernuechten, dat ass op der Hallefinsel ënnert Christchurch, si mir de ganze Wee zréck gefuer. Dat war eng super Iddi wann dir iech d’Fotoen ukuckt. Ech mengen mir haten nach ni esou e Camping mat der Vue wéi dësen.
Weider geet et iwwert d’Küstestrooss op Timaru. Och hei si mir op engem Camping vun der Gamm « Top Ten Holiday Park ». Owes nach e klengen Tour an d’Stad gemaach bis bei d’Caroline Bay an d’Cathedral St. Marie wou et de längste Piano gëtt, den « Alexander Piano » +/- 5 Meter lang.
Dësen holzene Liichtturm ass vun 1877
St. Mary's Anglican Church
Vun Timaru geet et gemittlech weider op Oamaru, wat eng ganz flott Stad um Mier ass mat rieseche Gebaier aus Kalleksteen. Fréier war hei vill lass well vun do gefruere Fleesch duerch d’ganz Welt verschéckt ginn ass. Haut sinn an den ale Lagere kleng léif Geschäfter a Galerien.
Owes komme mir zu Dunedin u wat ganz schottesch gepräägt ass. Dat wonnert een net ass dës Stad dach vun engem Schott gegrënnt ginn. De Musée zu Dunedin iwwert den Pazific an d’Maori huet eis et ugedoen a mir gi gläich zwee Mol dohin. Hei an NZ sinn d’Muséeën all gratis an mega modern.
Op der Hallefinsel Otago bei Dunedin gëtt et eng Albatrosskolonie wou mir eis fir eng Besichtegung ugemellt hunn. De Moment hu si Klenger. D’Albatrosse kréien nëmmen eng Kéier am Joer en Ee wat si ausbréien an dat eréischt ab dem Alter vun 8 Joer. Déi éischt fënnef Joer liewen si um Mier a kommen op d’Insel fir sech e Partner ze sichen.
Vun do fuere mir ganz erof bis op déi südlechst Spëtzt vun der Südinsel, duerch eng schéin hiwweleg Landschaft an e grousse Reebësch « The Catlins » Mir schlofen an engem Camping wou d’Frësche päifen. War nawell witzeg.
Zréck geet et iwwert Invercargill a Richtung vum « Fiordland National Park » D’Wieder ass zimlech duerchwuess a si soen hei et wär de schlechtste Summer säit 50 Joer. Moies an Owes hu mir d’Heizung un. Mir schlofen zu Te Anau. All d’Nimm vun de Stied an den Dierfer sinn op Maori Sprooch benannt.
Hei maache mir eng Bus a Schëffrees bis op Milford Sound wat an de Fiordlands ass. Eist Schëff heescht Sinbad a mir hunn eng jonk Fra vun +/- 28 Joer als Skipper.
Um Wee fir op Queenstown ass et duerch eng schéi Landschaft gang an duerno si mir laanscht de Lake Wakatipu gefuer wou an der Mëtt Queenstown läit. Dee Séi huet 77 Km an ass iwwert 300 Meter déif. D’Wieder gëtt ëmmer besser a mir freeën eis op Queenstown. Eng Stad wou et vill Aktioun gëtt. Canyon Jet, Shotover Jet, Skydive, Rafting, Bungysprangen a mat der Gondel op de Bierg.
Et waren zwee schéiner Deeg an der super jonker Stad.
Vu Queenstown si mir duerch en Dall mat ob all Säit immens grénge Bierger an schnéibedeckte Koppen an natierlech de Séien Hawea a Wanaka op d’Westküst gefuer. En wonnerschéi Stéck. E klenge Stopp hate mir zu Cardrona en « historical village »
Kuerz virun Haast, wou mir de Camping reservéiert hunn, stoung nach eng kleng Wanderung duerch e schéine Bësch bis op « Blue pools » um Programm. Alles am Ganzen e wonnerschéinen Dag.
D’Westküst ass méi schéi wéi d’Ostküst. D’Bëscher sin einfach méi gréng a mat vill verschidde Pflanzen. Rieseg Beem, grouss Jukkaën an enorm Farnbeem.
Blue pools