Mir fueren den 28ten op Tucson wou mir en Termin hu beim RV LaMesa fir ons Heizung. Leider ass de Responsabel fir Truma Heizung net do. Congé ! Firwat hien eis e Rendez-vous ginn huet ass e Rätsel. Mee mir kréien e neie fir Méindes den 3te Juni.

Wuel dass eis Klima och net méi geet fuere mir bei « Sprinter Mercedes Tucson » déi eis dat kënne flécken. Et ass de Compressor dee futti ass an et kacht eis 2.500 Dollar. Bei 40 Grad zënter Wochen investéiere mir déi Sue gären. Et ass eng Ofnotzung a wär och an Europa geschitt.
Zwou Nuechten am Hotel sinn ugesot bis mir de Camper zréck kréien. Als éischt gi mir an Down Town wou och dem Ralph seng Uni ass. E flotte Véierel mat Geschäfter a Restaurant’en. Leider ass de Ralph net méi do de Moment. Hien ass zu Lëtzebuerg a probéiert d'Norm fir d'Olympesch Spiller zu Paräis ze schwammen. Also dréckt emol all fest d'Daumen!

Den 30te Mee besiche mir de Pima Air & Space Museum. Mir hunn och nach e puer Deeg bis den 3te Juni a fueren an de State Park Catalina fir dräi Deeg. Vun do kënne mir och de Mount Lemmon besichen deen op 2400 Meter läit. Et gëtt e super Ausfluch mat herrleche Vue’en a virun allem 10 Grad manner……25 Grad.

Endlech ass da Méindes (03.06.24) a mir fuere bei den RV LaMesa mat vill Hoffnung dass eis Heizung a virun allem de waarm Waasser System ka gefléckt ginn. Leider ass d’Hoffnung net vu laanger Dauer well et hei déi Dieselpompel net gëtt déi mir brauchen. Also gëtt emol Récksprooch gehal mat TRUMA Däitschland….dat kann daueren.
Mir organiséieren also eisen Tour esou dass mir eventuell jidderzäit kënnen op Tucson zréck fueren. Iwwert Phoenix mat Stopp zu Prescott, Flagstaff a Richtung Page. Do ass dee schéinen Antelope Canyon dee mir onbedéngt wëlle kucke goen. Ouni Guide kënns de do net eran. Och sinn déi Touren um 12 :00 a 14 :00 zimmlech gefrot (d’Sonn steet do am beschten) an et brauch dräi Firma’e bis mir zwee Ticket’en ergattert hu fir de Freideg de 7te Juni um 12 :25 !

De Wee vu Flagstaff op Page/Lake Powell ass super schéin. Mir fueren nach eng Schläif duerch de Coconino NP fir de Sunset Crater Vulcano ze gesinn. Laut Informatioun ass dee virun 900 Joer ausgebrach. Och komme mir do nach bei den Iwwerreschter vun engem Duerf aus Steng vun de Wupatki laanscht. Vill Informatioune gëtt et hei net.

Owes hu mir eng flott Stellplaz um Lake Powell a freeën eis op den Antelope Canyon!

Um Wee op Las Vegas kënne mir de Brice Canyon vu wäitem gesinn dee mir schonn 2013 mam Rachel a Ralph besicht hunn. Genau esou wéi de Grand Canyon. Las Vegas ass ëmmer nees e flotte Stopp an hei hu mir och nach e RV fir de Problem vum warme Waasser/Heizung ze klären. Déi vun Tucson hunn sech bis elo net méi gemellt.

Endlech hate mir déi richteg Firma déi ons konnt hëllefe mat der Heizung. Si hunn den Héichtekit ausgebaut well deen déi ganz Installatioun blockéiert huet. Effektiv hu mir eng ganz nei Heizung déi en integréierte Loftdrocksensor huet an dofir och keen Héichtekit brauch. Leider eng Feelinstallatioun vun eisem Händler déi ons vill Zäit a Nerve kacht huet.
Um 16 :30 fuere mir nach 130 Km an de Norden no bei Alamo. Do ass e schéine Séi an engem Naturschutzgebitt « Pahranagat National Wildlife Refuge »wou een awer kann Iwwernuechten. Géint 20 :00 kënnt och nach de Ranger laanscht fir eis an de Register anzedroen. E klengt Gespréich an dann si mir ganz eleng op dëser formidabeler Plaz. An dat Bescht et sinn nach just 35 Grad a moies e Genoss bei 21 Grad um 5 :00 mat super DUSCH ! Herrlech no der Hëtzt zu Las Vegas (42 Grad).

Deelweis wiessele mir vu klenge Stroossen op den Highway fir an de Grand Teton NP an de Yellowstone NP ze kommen. D’Landschaft ass enorm a mir schlofen am State Park Jordanelle zu Herber City. Et ass de Moment ze genéissen a keng Suerge méi mam Camper ze hunn. Alles funktionéiert an de Parebrise hält.

Laanscht de Bear Lake fuere mir weider a kommen de Grand Teton National Park ëmmer méi no. Aus Zoufall gerode mir de Forest Allred Campground fir ze Iwwernuechten. Mir grillen net dobausse well mir net sécher sinn op hei Biere liewen. D’Dreckskëschten sinn op jiddefalls Bieresëcher !!
Fir d’Nuecht vum 15ten op de 16ten hu mir eng Plaz am Grand Teton NP kritt a mir si gespaant op dëse Park. D’Fotoe schwätze fir sech.

De Yellowstone an de Grand Teton sinn nëmme 35 Km vun eneen ewech an duerch de John D'Rockefeller jr. Memorial Parkway verbonnen. Zwee Deeg bleiwe mir am Yellowstone National Park mat senge Bierger, Flëss, Séien an iwwert 300 Geysiren. E vun de bekanntsten ass den « Old Faithful » mat enger Fontän bis zu 90 Meter. Eng Kalfront koum an der Nuecht a Moies si mir mat Schnéi erwëscht.

Mir fueren da schnell weider op Cody. D’Stréck ass mega schéin. De Musée vum Buffalo Bill steet fir haut um Programm. Mir sinn iwweracht wéi flott dee gemaach ass mat verschidden Aspekter wéi d’Liewe vum Buffalo Bill dee jo Cody geheescht huet a wéi déi verschidden Indianer Stämm gelieft hunn. Natierlech och vill iwwert d’Natur an d’Déieren hei am Wyoming. Mir verbréngen do dräi Stonnen.
Zu Greybull schlofe mir an d’Madamm vum Camping huet eis d’Big Horn Loop recommandéiert déi mir dann och Mëttwochs fueren. Mir sinn hei am Gebidd vun de « Wilde Horses » an der immenser Kuliss vun der Big Horn Mountains ». Einfach nëmme fantastesch mat fräi liewende Mustangen, Moosen, Réi etc. E formidabelen Dag.

Mir kënnen eis net sat kucken un der formidabeler Biergketten « Big Horn ». Ëmmer aner Vue’en dauche virun eis op. De Wee féiert eis iwwert Buffalo op Gillette wou mir e Stop maachen an do am « Prime Rib & Winnery » Restaurant mäi Gebuertsdag feieren. E gelongenen Owend.

De Jang wëll onbedéngt den Devils Tower kucke goen, deen an de Black Hills läit. Viru 50 Millioune Joren huet sech de Magma no uewe gedréckt an esou ass den Devils Tower entstan. En ass 264 Meter héich a ganz beléift bei de Klammerten ! Touristesch gutt ausgebaut mat Visitor Center a verschidde Weeër fir ze wanderen.

Weider fuere mir an de Custer State Park deen an de Black Hills läit. Do wëlle mir de « Crazy Horse Memorial » an de « Mount Rushmore » besichen. Et ass impressionnant wéi dës Skulpturen aus de Fielse gemeesselt gi sinn.

De Crazy Horse Memorial (den Häuptling vun de Lakota Indianer) ass schonn 80 Joer an der Aarbecht De Sculpteur Korczak Ziolkowski aus Bosten huet 1941 mat dësem Projet ugefaang ob Invitatioun hi vum Chef Henry Standing Bear. Hien a seng Fra d’Ruth hunn hiert ganz Liewe laang un dësem Projet geschafft. Zéng Kanner hunn si kritt (5 Meedercher a 5 Bouwen) déi all an der Fondatioun "Crazy Horse Memorial" matschaffen. Et wäert och nach vill Joren dauere bis en endlech fäerdeg ass. De "Mount Rushmore" huet nëmme 14 Joer gebraucht an ass Statlech.

Am Custer State Park lieft och déi gréisste Bison Herd mat ongeféier 1500 Stéck. Méindes fuere mir Wild life loop wou mir kënnen e grousse Grupp gesinn. Wéi den Zoufall et wëllt treffe mir do op d’Claudia an den Toni déi mat eis déi zwee Méint duerch Südamerika gefuer sinn. Freed ass grouss. Eisen National Feierdag hu mir och net vergiess.

Fir den 9te Juli hu mir e Rendez-vous bei Mercedes zu Denver kritt well mir mussen eng Revisioun « A » maachen. Mir sinn emol gespaant op dat klappt.
Duerfir hu mir elo méi Zäit a sinn nach an de « Badlands National Park » ëmmer nach am South Dakota gefuer. Ech duecht dat wär eng riseg Prairie wou näischt ass ! Wäit gefeelt. Effektiv ass et eng Erosiounslandschaft (98.700 Hektar) déi fir Landwirtschaft net geegend ass. En Naturwonner. Eng wonnerbar Landschaft aus Schluchten an immens gréng bewuess. Hei liewen och Bighorn Schof, Bison’en, Luchsen, Kojoten, Schlaangen an natierlech verschidde Vullenaarten.

Well mir net méi dee selwechte Wee zréck op Rapid City wëlle maache fir Richtung Denver, fuere mir duerch d’Indianer Reservat « Pine Ridge » an nodréiglech nach duerch Grasslands. Eng super schéi Stréck duerch gréng Felder a Wise mat Maïs, Hee a Stréih. Hei gëtt et ausser Akerbau a Véizuucht an en zwee Dierfer soss näischt. Et geet an Nebraska wou mir am Fort Robinson State Park eng schéi Plaz kréie fir ze iwwernuechten. Hei si vill Kämpf tëschent den Indianer an den Amerikaner ausgedroe ginn. Och soll den Häuptling vun de Lakoten, Crazy Horse, hei ëmbruecht gi sinn. Vu Cheyenne fuere mir Richtung Estes Park an de Rocky Mountains. Nach e klenge Stop zu Loveland mat engem schéine Skulpture Park. Beim Erwina an Ernie kréie mir eng TOP Stellplaz bis de 6te Juli mat Vue op d’Rocky’s.

Déi Woch beim Erwina an Ernie war voll gepak mat Aktivitéiten an ass immens séier ëm gaang. Estes Park ass esou eng flott kleng Stad déi nach hire Charme behal huet trotz de villen Touristen déi heihi kommen. Estes Park läit um National Park vun de Rocky Mountain. En Dag verbrénge mir moies mat administrativen Aarbechten a mëttes geet et an d’Stad. Fir zwee Deeg huelen ech mir e Permis fir ze fëschen.
Een Dag verbrénge mir an de Rocky’s mam Erwina an Ernie als Guiden. Den Ernie ass hei gebuer an huet säi ganzt Liewen hei verbruet a weess natierlech villes ze zielen. E formidabelen Dag. Owes si mir och nach mat invitéiert fir de Nationale Feierdag vun Amerika.
Als Ofschloss wëlle mir nach e Rodeo kucken zu Estes Park dee grad elo hei eng Woch ass an ech däerf mam Ernie sengem Cyber Truck an d’Stad fueren. Freides ass Ouverture. Cool wéi mir alle féier si gi mir owes dohin a staunen net schlecht « SOLD OUT » steet un de Keesen. Mee de Jang gëtt net op a barratinéiert Madamm an der Entrée déi Ticket’e kontrolléiert. Keng Aussicht op 4 Ticket’en. Enttäuscht sti mir beim holzene Gelänner a kucke vu ganz wäit wat geschitt. Beemol kënnt d’Madamm vun der Entrée bei de Jang gelaf a weedelt mat 4 Ticket’en an der Hand vun enger Famill déi net konnt kommen an se zréck ginn huet. Dat bescht kënnt awer eréischt well et ware Gratis Ticket’en a mir komme fir näischt eran an hunn e super Owend erlieft. Ech weess zwar nach ëmmer net richteg wat de Jang der Madamm gezielt huet mee et hat déi richteg Wierkung !