Mëttwoch den 10te Juli fuere mir dann nees weider no eisem Rhythmus. Den éischte Stopp ass zu « Red Rock », en Amphitheater a Vierbierger vun de Rocky Mountain westlech vun Denver. Schonn Ufank 1900 hunn se gemierkt dass hei eng super Akustik ass an den John Brisben Walker hat d'Iddi hei Concert’en ze organiséieren. 1927 huet d’Stad Denver dësen Arel vum Walker ofkaf an déi éischt Pläng vum jëtzegen Amphitheater sinn entstan. 1947 sinn déi éischt grouss Concert’en hei präsentéiert ginn. An der Hall of Fame kann een all déi grouss Nimm liesen déi schonn hei opgetruede sinn.
Owes schlofe mir bei engem Wäinhändler, Vino Salida, wou mir e puer Wäiner aus Colorado kënne schmaachen. Den Deal ass 1-2 Fläsche Wäi kafen a fir näischt hei schlofen. Dat kréie mir hin……

Déi nächst Deeg fuere mir op enger gudder Strooss duerch d’Rocky Mountain. Fairplay, Buena Vista, Salida, Del Norte, Pagosa Springs. Zu Del Norte hu mir e längeren Openthalt an der Klinik. De Jang huet eng schlëmm Infektioun ënnert de décker Zéif. Gesäit net gutt aus. Si maachen de volle Programm. Bluttanalyse, Rëntgen, Ofstréch ! En Antibiotique mëscht et a mir fuere weider. Déi nächst Deeg hale mir en A drop !! D’Rechnung kënnt per e-mail !!!!

Mir sinn zwee Deeg ze fréi a ginn emol den Anasazi Heritage Center besiche wou mir vill Informatiounen iwwert « Pueblo » kréien, Dierfer déi ëm 1200 no Chistus an de Buedem gebaut gi si vu verschidden indianesch Tribu’e wéi Ute, Hopi, Zuni. Den Zweeten Dag maache mir de « Mesa Top Loop » Tour am National Park. Esou kënne mir verschidde Puebloe vu bausse bestaunen. Et ass scho spannend ze gesi wéi d’Leit hei a der Mesa Verde demols gelieft hunn.

Fir de 14ten hunn ech zwee Ticket’e reservéiert fir Visitt vun engem Pueblo, dem « Cliff Palace ». Bei der Visitt kënne mir erof an de Pueblo klammen. Et ass bis haut net kloer firwat d’Leit deemools sech an d’Fielsen zréckgezunn hunn. Fläischt fir méi sëcher ze sinn.

No der Visitt fuere mir direkt nees e bëssi an de Norde well mir gären den Arches NP wëlle kucke goen. Deen ass am Utha an 280km léie virun eis mee d’Strooss ass gutt, d’Vue si super schéin a mir wiesselen no zwou Stonnen. D’Hëtztwell vu Las Vegas kënnt lues a lues an d’Mëtt vun Amerika an d’Temperature ginn nees erop bis 38 Grad. Eng Stellplaz fanne mir an de Bierger déi och vum NP geféiert gëtt. Mir sinn zu zwee Camper. Et ass genial ! Am Park muss een sech umelle fir eng gewësse Stonn. Alles ass besat bis 13 :00. Viru 7 :00 an no 16 :00 brauch ee kee Slot ze reservéieren …. Also um 5 :30 opstoen an direkt an de Park gejauft. Et gëtt méi spéit Kaffi gedronk an dat huet sech definitiv gelount.

Zu Banding fale mir op e Camping vu Good Sam. Et ass bis elo dee schéinsten a mir si praktesch eleng. E gëtt vun enger Navajo Famill geréiert déi och en « Trading Post » Geschäft dobäi hunn. Et sinn dat Souvenir Butteker fest an « navajo » Hand. Vill indianesche Schmuck, holze Skulpturen a Kiltdecke ginn hei verkaf.
Moies decidéiere mir nach an de Petrified Forest NP ze fueren. Esou komme mir fir d’zweet an den Arizona. Och dat war eng gutt Entscheedung well de Wee bis an de Park ass super schéin a féiert eis duerch d’Navajo Reservat an de Chelly Canyon. Zu Bluff maache mir nach e Stopp fir d'Fort vu Bluff an de Kierfecht ze besichen. Am Park kënne mir da verstengert Bamstämm bewonneren. Wéi schon zënter e puer Deeg gëtt et en Donnerwieder an e puer Schauere mat ganz vill Wand géint 15 :00. D’Temperatur fält ëm 15 Grad. Dat ganzt dauert eng Stonn. Duerno gëtt et nees extrem waarm ëm 35 Grad. Ganz speziell !

Banne 4 Deeg fuere mir vun Arizona duerch New Mexiko an den Texas. Iwwert wonnerschéi kleng Stroossen. Duerch Bierger, Dierfer, kleng Stied a Prärie’en. Owes siche mir eis eng Plaz bei RV Park’s oder bei engem « Harwest Hosts ». Dat ass eng APP wou mir eis ageschriwwen hunn a wou ee kann Iwwernuechten. ZB : Bei engem Wënzer, engem Bauer, enger Brauerei e Musée oder e Restaurant. Et keeft een eppes oder et gëtt een e klenge Betrag. Am Texas komme mir laanscht d’Uelegfelder mat den néidege Pompelen. Eis nächst Visitt ass Fort Worth bei Dallas wat soll ganz flott sinn.

Duerch léif Frënn vun eis, d’Claudine an de Fränk, hu mir de Kontakt kritt vum Mike Ries engem Lëtzebuerger deen hei am Texas zu Whitesboro e B&B huet, den « Four Oaks B&B, 565 Chisum Trail Road, Texas ».

Dat ass och net wäit vun Dallas ewech a mir ginn de Mike Ries besichen a bleiwen do zwou Nuechten. De Mike huet wärend dräi Joer 1 Appartement an zwee Zëmmer wonnerbar installéiert. Et kommen nach 1 Appartement an zwee Zëmmer dobäi. Et läit immens schéin an der Natur wou hien och säi Päerd an zwee aner Päerd lafen huet.

Den RTL hat schonn 2023 an hirer Sendung « Lëtzebuerger am Ausland » iwwert seng Ranch e Reportage gemaach.
Merci Mike fir déi flott Zäit déi mir bei dir konnte verbréngen a virun allem déi lëschteg Owender.

De 24te Juli hu mir zwee Ticket’e fir Texas Rangers (Dallas) géint White Sox (Chicago) kucken ze goen. Vum Baseball versti mir net grad alles mee d’Ambiance ass bestëmmt formidabel !!

Mir verloossen Texas a fueren iwwer kleng ländlech Stroossen, wonnerschéin Haiser a Louisiana. Louisiana ass virun allem bekannt fir den Ubau vu Bamwoll an Zockerrouer. Immens schéi Proprietéite kann een hei gesinn an och kucke goen.Natierlech ass all déi Aarbecht um Feld oder an dësen Haiser vu Sklave gemaach ginn, wat och hei a villen Informatiounen opgeschafft gëtt.

Um« Harvest Hosts » fannen ech « Houmas House » wou mir kënne gratis schlofen. Hei am Restaurant iesse mir dann Owes a besichen dee wonnerschéine Gard deen nuets beliicht ass.

D’Visitt vum Haus an de Musée kënne mir moies maachen. Verschidde Beem hei am Park hu 600 Joer (Oak tree) Immens!

Mir fueren d’River Road laanscht de Mississippi bis op New Orleans a besichen« Oak Alley Plantation »

New Orleans !! wou mir zwee Deeg bleiwen an einfach Zäit genéisse mat coolem Blues a spadséieren duerch d’Downtown. Och hu mir do gudden Empfang fir dem Ralph seng 100 Meter crawl bei den Olympesche Spiller ze verfollegen. Moies um 4 :00 Auer (USA) Zäit ! Maache mir jo gären!!

BRAVO!! Ralph fir deng super Performance !!!

Weider fuere mir d’Strooss « 90 east » bis Pensacola, ëmmer schéi laanscht Mier, de Golf vu Mexiko. Och nees wonnerschéin Haiser mat groussem Beréng, flott Fëscher-a Yachthäfen, a Stränn. Eenzege Bemol et ass extrem waarm a fiicht hei am Süden. An der Bay Saint Louis fanne mir eng flott Stellplaz am Buccaneer State Park.

En Dag fuere mir nach duerch Florida fir a Georgia ze kommen. Savannah op der Ostküst (Atlantik) ass eist Ziel. Iwwert den Harvest Host fanne mir «Coach’s Corner». Dee läit ganz no beim Downtown esou dass mir do zwou Nuechte bleiwen. Et ass e Sport Bar & Grill Restaurant. Vill lass an owes gëtt et eng gutt Pizza mat engem net esou gudde Concert. Mee bon et kann een net alles hunn. Savannah ass déi eelste Stad vu Georgia mat enger Waterfront a flottem Downtown.

Éischtens wëlle mir der Hëtzt entkommen an zweetens hu mir eng Warnung op eis Telefone kritt dass fir e Méindeg en Hurrikan op Savannah trëfft, duerfir fuere mir Méindes moies fréi Richtung Norden. An d’Appalachian Bierger an d’Great Smoky Mountains wëlle mir fueren. Virun 10 Joer hate mir schonn en Deel dovu gemaach an dat huet eis gutt gefall.

Ënnerwee erliewe mir ëmmer nees flott Saachen….léif Leit, schéin Dierfer, cool Stellplazen a Parken oder Campinger. Esou si mir op engem Camping zu Milledgeville Georgia gelant. Wéi ech eis ugemellt hu geet d’Dier op an eng 5-6 kleng Kanner (1-2 Schouljoer) kommen erageschoss, triwwelen den Hond an huelen sech aus enger riseger Këscht 2/3 Kamellen, Schockela oder Knätsch eraus, soe fein « Hey Ma'm a thank you Ma'm » a schwupps si si nees dobaussen. D’Madamm um Comptoir erkläert dass d’Kanner all Dag no der Schoul bei si era komme fir den Hond an natierlech d’Kamellen. Si fënnt dat flott an huet am Lager nach dräi riseg Tute Kamellen etc.

Ech denken un de Rescht Spillsaachen déi ech nach am Camper hunn a kréien d’Iddi der Madamm déi ze loossen. Si ass Happy an d’Kanner bestëmmt och. Merci Max fir deng schéi Spillsaachen déi ech konnt déi lescht Méint verdeelen !

Ab den 9ten August fuere mir um « Blue Ridge Parkway », North Carolina/Virginia. Dës Strooss ass 469 Meile respektiv 844 Km laang a geet vun de « Great Smoky Mountains » bis « Shenandoah ».
Den héichste Punkt ass 1800 Meter an de gréissten Deel verleeft op enger Héicht tëschent 1000 an 1500 Meter. Déi éischt Pläng sinn entstan 1930 a fäerdeg war déi wonnerbar Strooss 1982 (also 52 Joer huet de Bau gedauert).

Iwwert 250 overlook’s kann een ufueren. Grandios ! Déi ganz Strooss geet duerch en National Park a gëtt och vum Park ënnerhal genau wéi d’Campinger déi mir kënne buchen iwwert d’App « NPS ». Et sinn herrlech Deeg nëmmen an der Natur, bal ouni Internet, all Dag e puer Réi a laut dem Ranger ass Bierenalarm……gesinn hu mir bis elo nach keen !

Ënnerwee mierke mir dass e Pneu Loft verléiert. Also musse mir erof vum Blue Ridge Parkway. De Mann vum « Mainly Brakes » zu Roanoke fënnt dann och séier de Grond…eng Schrauf am Pneu. Schnell gëtt de Pnö mam Ersatzpnö gewiesselt. Leider huet de gudde Mann eis och gesot dass d’Bremse schlecht sinn. Elo heescht et e Mercedes fir Sprinter fannen déi d’Bremse kënne wiessele bei eisem Sprinter……an natierlech och op Lager hunn. Affaire à suivre ! Elo geet et emol zréck op de Blue Ridge Parkway.