No mir dann och de Skyline Drive gemaach a fuere Richtung Washington DC an Arlington. Zu Washington ware mir schonn 2013 mee grad do war e « Govermental Shutdown » a villes zou. Zu Arlington besiche mir de Nationale Kierfecht wou bal 400.000 Zaldote begruewe sinn. Zënter dem Biergerkrich an den 1860er Joren besteet dëse Kierfecht. Ass schonn emotional ! Dräi Stonnen huet eis Visitt gedauert.

Leider huet et net geklappt zu Salisbury fir d’Bremsen ze wiesselen. Si hate kee Lift fir eise Camper ze hiewen !! Mir denken dass si net wollte mam Krick schaffen an um Buedem schaffen ! Mat eisen ale Bremse fuere mir zimmlech enttäucht weider.

Op der Stréck zu Milfort (Stat Delaware) gesäit de Jang aus Zoufall en anere Mercedes Garage a mir fuere spontan dohin. Et ass Samsdeg an den Atelier ass zou mee mir gi ganz léif vun engem Vendeur empfaang. Et gëtt e flott Gespréich iwwert eise Camper, eis Reesen a wéi a wou mir verschëffen. Méindes solle mir zréck kommen ! E gemittleche WE am Bësch Camping nobäi, wou net vill Camper sinn, ass grad richteg. Also bleiwe mir an deem Eck.

Méindes gi mir zréck a kréien do en Top Service gemaach. D’Bremse vier sinn nach gutt an déi hënnescht mussen effektiv ersat ginn. Si bestellen déi direkt an den Dag drop kann d’Aarbecht gemaach ginn. De Rescht vum Méindeg verbrénge mir am « Delaware State Park » an um Rehoboth Beach. Den Dag schléisse mir mat engem gudde Crab cake of.

Dënschdes kënne mir dann um 12 :00 Auer endlech mat gudde Bremse weiderfueren.

Mir hu schonn d’Schëff reservéiert fir den 31ten Oktober vun Halifax aus. D’Fligeren vun do op Tucson, mat engem Stopp beim Ralph, an da weider op Lëtzebuerg sinn och gebucht. Dat muss alles bei Zäiten organiséiert ginn.
Lues a lues schaffe mir eis erop an de Main an de Vermont. Mir huelen d’Strooss laanscht d’Küst a genéissen dat gutt Wieder an d’Leit déi immens léif sinn. Mir fale prompt op de Labor Day an bleiwen de WE fest op engem Camping bis de Stress eriwwer ass. Et ass e laange WE an all Camping, Bucht a Restaurant iwwerfëllt. Guer net ze schwätze vun de Stroossen. Ech muss och emol nees de Camper botzen an d’Wäsch maachen….bof bof !

Am Whole Food hu mir Raclette Kéis aus der Schwäiz entdeckt. Natierlech direkt kaf !!! Super … wuel dass et elo och Owes méi frësch ass.

Cape Cod steet um Programm éier mir iwwer Bosten an de Maine fueren. Am Harvest Host fanne mir d’Stony Creek Farm wou mir kënnen um Wee e Stopp maachen. Dës Farm ass e Melange vu Päerd, Geessen, Katzen, Kéi, Kälwer, Hinger, Schwäin an Alpaca’en. Vill Déieren huelen si op well se soss géifen dout gemaach ginn. Eng super Saach. Och gëtt et hei e « Farmer’s Market » mat Geméis, Uebst an Eeër. Ech hunn och gesinn dass d’Kanner héi Reitstonne kréien. Mir bezuele wéi ëmmer näischt a maachen en Don fir den Haff.

Zu New Bedford virum Cape Cod ass et interessant de Walmusée ze kucken. Virun 100 Joer huet dës Walfänger Stad hiren Héichpunkt gehat.

Immens flott ass et zu Cape Cod a mir verbréngen do e schéinen Dag. Owes schlofe mir bei engem « Ship Chandler » a kafen e puer Schrauwen als MERCI.

Boston wëlle mir eis och nach ukucken an duerfir hunn ech eng Stellplaz bei enger Brauerei zu Pawtucket reservéiert. Um Wee dohi maache mir e Stopp an enger Pâtisserie. De Patissier ass immens léif a schwätzt franséisch well en zu Paräis säi Beruff geléiert huet.

Vun do sinn et nach 40Km bis bei d’Brauerei. Wéi mir do ukomme mierken ech dass ech meng Posch beim Patissier stoe gelooss hunn. Gottseidank hat hien eis seng Kaart ginn a mir ruffen direkt un. Kee Problem « ech sinn op bis 20 :00 !

D’Stellplaz ass en ëffentleche Parking bei der Brauerei wou mir net wëlle schlofen esou dass mir direkt zréckfuere meng Posch ofhuelen. Net wäit ewech ass e Camping wou mir dann zwou Nuechte bleiwen (entretemps ass et hallwer aacht). Mir sinn nawel e bëssi gestresst!

Flott ass awer dass mir vun do kënne Boston besichen. Mat Uber an Zuch geet dat tip top.

De Musée of fine Arts ass ee vun de gréisste Musée'en aus Amerika. Immens flott gemaach. Och e Bild vum Edward Steichen konnte mir do gesinn.

Elo hoffe mir op e schéinen Indian Summer. Beim Steve zu Handock (New Hampshire) verbrénge mir eng roueg Nuecht a fueren iwwert eng scenic road duerch kleng Dierfer weider an de Vermont. De Camping owes zu Andover gëtt vun engem Éisträicher gefouert deen sech wonnert wéi mir bei him konnte landen ! An nees erziele mir gär eis Geschicht.

Méindes (den 9te September) schlofe mir emol nees an engem State Park an zwar dem Little River State Park. Ganz schéin am Bësch a praktesch eleng. Leider hu mir nees Problemer mat eiser Heizung zënter e puer Deeg. Moies huet se elo definitif gestreikt. Mir wäerte bis Halifax mussen ouni Heizung a waarm Waasser auskommen. Hei am Norde gëtt et keng Firma déi eppes vun « Truma » versteet. Et nervt well et jo nuets och elo méi kal gëtt. Mir versiche Stellplazen ze kréie mat Elektresch well mir eng kleng Heizung dobäi hunn déi de Camper owes a moies e bësschen ophëtzt.
Desto trotz ass de Vermont immens schéin. Eng vun de schéinste Routen ass d’112. Déi geet duerch de White Mountains National Forest.

Enn der Woch komme mir an de Maine an dirigéieren eis op d’Küst déi ganz schéin ass a wou et Lobster a Crab cake à gogo gëtt. Eng bis zwou Woche wäerte mir laanscht d’Küst fuere bis an den Acadia National Park. Hei ginn et dräi Campinger déi all ausgebucht sinn ! Et ass e vun de beléifte Parken hei am Maine. Mir hunn eis scho virun zwou Wochen op eng Waardelëscht agedroen. Gëschter krute mir d’Confirmatioun fir eng Plaz vum 27-30te September…..ouni Elektresch ! Mol kucke wéi kal et da schonn ass.

Route 1 soll jo d’Küstestrooss si mee vun der Küst gesi mir net vill well d’Strooss de gréissten Deel duerch de Bësch geet. Also fuere mir all déi kleng Fjorden of déi vun der Route 1 fort ginn. Tëschent 100 an 150 Km maache mir den Dag…..et gëtt einfach ze vill flott Plaze fir stoen ze bleiwen.

Voll am Halloween Féiwer !

D’Meg, eisen Host vum 23ten, huet eis nach gesot dass nobäi d’Fort Knox an d’Penobscot Narrows Bridge ze besiche wären. Also net dat Fort Knox wou dat villt Gold läit !! Virun allem d’Bréck huet eis gutt gefall well een do ka mam Lift bis op 136 Meter eropfueren. D’Vue vun do ass spektakulär (360 Grad) iwwert de Penobscot River an eben dëst klengt Fort Knox.

Ob eisem Wee duerch déi vill Fjorden hu mir ëmmer nees flott Erliefnisser. Kleng Duerfmuséeë gi mir kucken a lauschtere Geschichten iwwert d’Lobster Fëscherei.

Donneschdes reent et wéi mat Eemeren a mir bleiwen einfach emol en Dag doheem do wou mir grad sinn……zu Stonington, ganz ënnen un der Spëtzt vun engem Fjord. E klenge private Camping vum Troy & Monica White. Stonington huet grad mol 1000 Awunner an dovun hunn der 600 eng Lizenz fir ze fëschen. A gleeft mir et ! hei gëtt et en Top Restaurant mat just 10 Dëscher a wonnerbare frësche Fësch a Lobster Roll à go-go.

Den Highlight vun dësser Woch ass den Acadia National Park. An den 1ten Oktober feiere mir dem Jang säi Gebuertsdag.

Mir kommen ëmmer méi no un déi Kanadesch Grenz an zu Lubec checke mir am « Sunset Point RV Park » an. D’Madamm ass esou eppes vu léif a mir hunn e witzegt Gespréich iwwert Coockies, Chocolat etc. Ech verroden hier dass mir grouss Fane si vun den amerikanesche Coockies a mir all Dag Coockies iessen. A gutt dräi Woche ginn et keng méi ! Moies fir de Kaffi bréngt d’Madamm eis frësch Coockies déi si selwer gebak huet..wonnerbar !

Mir verbréngen eng flott Zäit hei a besichen och « Campobello Island » wou de President Franklin Roosevelt a seng Fra d’Eleonor sech eng Cottage (34 Zëmmer) an den 30er Joere gebaut hunn. Zënter 1963 (wärend dem President Regan senger Amszäit) ass « Roosevelt Campobello » en internationale Park dee vu Kanada an Amerika ënnerhal a gefouert gëtt. Dräi aner Cottage kann een och besichen déi am Park leien. Zwee Liichttierm ginn et och nach ze bewonneren op der Insel déi zu Kanada gehéiert. Esou ass et komm dass mir e kuerzen in and out a Kanada gemaach hunn.

Déi lescht Fotoen aus dem schéine Maine. De 4ten Oktober verloosse mir Amerika no bal fënnef Méint a reesen a Kanada an.