Eigentlech hu mir geduecht einfach iwwert d’Grenz « Amerika-Kanada » ze fueren. Dat war awer d’Rechnung ouni déi Kanadesch Douanier’e gemaach. Als éischt hu mir missen eng Rei Froe beäntwerten : Wat hutt dir gemaach an Amerika a wat maach dir elo hei ? Hutt dir Alkohol a wéivill ? Hutt dir Drogen oder Zigaretten ? Hutt dir Waffen ? Wéi ass den Auto an Amerika komm ? etc etc
Du koumen zwee aner Douanier’en déi de ganze Camper bannen duerchsicht hunn. Ze beanstanden haten si, dass mir méi Alkohol hu wéi uginn ! Bon ! Si sinn awer relax ! An dass mir zwee kleng Bamstécker aus Mexiko hunn déi ganz speziell geformt sinn Op dat Undénke sinn ? Déi solle mir 2 bis 3 Deeg an den Äisfach leeë fir d’Bakterien ze killen déi kéinten dra sinn. D’Holz fir Lagerfeier hu mir dierfe behalen awer mussen et direkt verbrennen ! Owes maache mir dat och.
Bienvenue au Canada !!
Zu St. Andrews verbrénge mir e puer Stonnen. Am Hafe moossen e puer Jonker d’Krabben a féiere Buch. Owes schlofe mir zu St. John am Woodrock Campground a wéi den Zoufall et wëllt treffe mir do de Gabriel an de Jean Philippe déi mat eis op der éischter Panamericana ënnerwee waren. Einfach genial wéi esou eppes ka sinn. Mir verbréngen en flotten Owend zesummen. Si fueren direkt op Halifax mir eréischt an zwou Wochen.
Och hei ass lo den Indian Summer esou richteg schéin ze gesinn. Um Ferry, deen duerch « d’Bay of Fundy » fiert fir op d’Digby (Nova Scotia) hu mir « pole position » ! D’Bay of Fundy ass bekannt fir hir hegste Marée’e weltwäit, bis zu 13 Meter. Bei enger Sprangflut kann et esou guer bis zu 16 Meter sinn. An dat zwee mol den Dag.
Mir besichen Digby a fueren no zwee Deeg weider an de Süde vun Nova Scotia. Ëmmer schéin der Küst no. D’Wieder ass eigentlech gutt ausser dee ganz staarken a kale Wand. Rafale bis zu 35/38 Kniet si méiglech. E Samschdeg sollen et esouguer bis zu 52 Kniet ginn. Wann dat esou ass siche mir eis eng Stellplaz méi am Land a fuere Sonndes oder Méindes nees op d’Küst. Affaire à suivre.
Mir hunn och d’Noricht kritt dass mir op en anert Schëff ëmgebucht gi si wat 4 Deeg méi spéit fortfiert. Zu Baltimore hunn d’Aarbechter am Hafe gestreikt an elo ass do en immense Retard entstan esou dass verschidde Schëffer net den Hafe vun Halifax ulafe mee direkt weider fuere fir d’Zäit opzehuelen. Eis kascht dat elo nees e puer Deeg méi Parking am Hafen ….
Ob eisem Wee op Halifax maache mir aus Zoufall e Stopp zu Shelburne a komme grad richteg fir eng Regatta mat Kürbissen ze kucken. Verschidde Kürbisse weien iwwert 500 Kilo. Deen déckste Kürbis ass präméiert ginn. Den Éischte bei der Regatta natierlech och. War eng lëschteg Geschicht !
Owes komme mir dann zu Lunenburg un. Lunenburg ass eng historesch Stad déi 1759 gegrënnt ginn ass an och als UNESCO Weltierwen agedroen ass. Mir buchen emol zwou Nuechte. Éischtens ass de 14ten Thanksgiving day an d’Geschäfter sinn all zou ausser de Fëschermusée an zweetens hu mir eisen 13ten Hochzäitsdag. D’Restaurant’e sinn op a mir gi gediigen iessen ! Dënschdes ass esou schéi Wieder dass mir spontan nach eng Nuecht bleiwen an eis déi schéin Alstad ukucken. Natierlech däerf och hei eng « Lobster roll » net feelen. Halloween ass och nach ëmmer en Thema.
Zu Mahone Bay hunn d’Awunner eng flott Hiescht Deko duerch d’Duerf gemaach déi dann och präméiert gi sinn. Hei nëmmen e puer…..witzeg !
D’Visitt vum Memorial « Swissair Flight 111 » den 1998 bei Peggy’s Cove erofgefall ass ass ergräifend. All 229 Leit u Bord sinn hei ëmkomm. D’Gedenkstätt ass immens schéi gemaach.
Duerno fuere mir nach op Peggy’s Cove, e klengt Fëscherduerf, wou mir dee meescht fotograféierte Liichttuerm och kucken a fotograféieren.
Déi lescht Deeg profitéiere mir vum schéine Wieder a fuere weider op der Lighthouse route. Et ass zwar kal Moies an Owes am Camper just mat der klenger elektrescher Heizung mee am Dag klammenTemperature bis 16 Grad. Et huet een d’Impressioun dass Faarwen vun de Beem och vill méi staark sinn……richteg schéin !
Den 21ten Oktober sollte mir am Camping KOA anchecken no bei Halifax (35Km). No genauer Iwwerleeung hu mir decidéiert an e Motel zu Halifax ze goen. Hei hu mir eng Parkplaz virun der Dier a waarm Duschen. PROBLEEM HEIZUNG ! Och si mir ganz no bei allem….Hafen, Fluchhafen, Restaurant etc. Elo heescht et de Camper fir d’Schëff ze präparéieren.
Dat gëtt nach e bëssi Aarbecht. Et sinn ewell immens streng Kontrolle wat een däerf am Camper loosse fir den Transport. All Iesse muss eraus. Och Gewürzer, Reis oder Nuddelen. Keng Medikamenter, Spraydousen, Botzmëttel, Akkuen, Alkohol etc. Et sinn alt Camper net matgeholl ginn nodeems de Besëtzer scho fort war an de Kontroller Verschiddenes refuséiert huet. Zënter dem 10ten Oktober huet all Camper e Kontroller deen zesumme mam Besëtzer de Camper duerchkuckt beim ofginn am Hafen. Seabridge déi eisen Transport organiséieren hunn eis geroden emol eng Ökostut prett ze hale fir alles wat se refuséieren !
Nodeems mir de Camper zu Halifax am Hafen ofgeliwwert hu fléie mir zréck op Tucson bei de Ralph deen do op der Uni ass. Den Eltere Comité vun de Studenten organiséieren all Joer e « Family Weekend » um Site vun der Uni. Wärend zwee Deeg si Stänn do wou een Informatiounen, Iessen, Gedrëngs a Gadget’e kritt. D’Eltere belageren d’Uni mat Kind und Kegel. Iwwerall gesäit ee Leit mat offiziellen Uni’s T-Shirt’e wou Mom, Dad, Sister, Bruther, Grand Mom oder Grand Pa drop steet. D’Amerikaner sinn do jo net ze bremsen. Flott organiséiert mat vill Musek an d’Cheerleader.
D’Schwëmmer vun der Uni Arizona, wou de Ralph jo och dran ass, hunn och dee WE eng Cours mat de Schwëmmer vun der Uni Utha, déi och knapps gewannen. D’Ambiance ass trotzdeem mega an hei hu mir misse wäiss ugedoe sinn. Owes ass e Football Match « Arizona Wildcats géint West Virginia » Do hunn d’Elteren och d’Ticket’en organiséiert. Top Plaazen an hei huet ee misse rout ugedoe sinn. Einfach flott wat vun Ambiance an Effekter ronderëm dës Matcher sinn.
Dernieft verbrénge mir eng immens flott Zäit mam Ralph a senger Mamm Françoise mat Visitte vun der Uni, Tubac mat e puer schéine Gallerie'en, enger Winery, dem Saguaro NP a gutt Iesse goen…..
