Panamericana fir zweet.....

    2019 hu mir eis op de Wee gemaach fir dem Jang säi grousse Wonsch ze erfëllen, d'Panamericana mam Camper ze fueren. Et ass dat eng legendär Route vun Argentinien/Buenos Aires bis Amerika/Prudoe Bay. 

Mir si bis Costa Rica komm am Abrëll 2020 .... du koum "Corona" a mir hu fënnef Méint an deem wonnerbare Land verbruecht fir schlussendlech awer Heem ze kommen. D'Grenze sinn einfach net opgaang.

   Elo véier Joer méi spéit hu mir d'Chance mam Janette, eisem Guide vun deemools, d'Panamericana vu Costa Rica aus bis an Amerika weider ze fueren. (Costa Rica, Nicaragua, Honduras, Guatemala, Mexico, USA)

     Ob mir bis op Prudoe Bay fuere steet nach an de Stäre mee eent ass sécher eis Aventure gi weider an ech hoffen dir/du sidd/bass och iwwert mäi Site dobäi. Ech géif mech freeën!

Den 31te Januar ass

d'Schëff "Morning Lily" zu Zeebrugge mat eisem Camper u Bord a Richtung Panama ausgelaf. Ukomme soll et de 17te Februar.

Pünktlech de 17te Februar ass d'Schëff zu Manzanillo/Colon ukomm a mir wéi virgesinn den 22ten.  

De Camper aus dem Hafen huele brauch ewéi ëmmer e puer Stonnen. Eisen Agent hëlleft eis duerch déi verschidde Büro'en. Leider musse mir feststellen dass de Navi ausgebaut ginn ass. Mir hunn awer en Ersatz dobäi esou dass dat eis net weider stresst. 

Déi éischt Woch verbrénge mir zu Panama am Radisson Hotel Panama Canal,  dee wéi de Numm et seet, direkt um Canal läit. Hei hu mir elo genuch Zäit Diesel, Gas a Waasser ze tanken. Panama gëtt och nach visitéiert an de 29te fuere mir da Richtung Costa Rico.